近年唔少人希望為古代用語翻案，特別係一啲涉及性別嘅詞語，好似「賤內」以前係對自己妻子嘅謙稱，但始終夫妻係兩個獨立個體，咁謙稱另一個人就可能會令伴侶唔舒服。
網上有啲人就話唔應該再理解成男尊女卑嘅貶稱，而係反轉去解釋成「我呢個賤人嘅內人」，即係老公自謙，再介紹老婆，聽落好似更平等，重幾有幽默感。但呢種新詮釋，真係有語言基礎？定係只係將現代觀念硬套落古人用語之上？
如果改錯咗方向，其實只會加深對歷史語言嘅誤解。
喺《金瓶梅》呢本成日講妻子嘅古典文學入面，「賤內」自然成日出現，甚至有好似「大賤內」、「第六房賤內」呢啲用語，語感上都係一個完整詞語，用嚟指自己其中一房妻子。如果「賤」係形容自己嘅話，其實應該會變成「賤第六房內」先係賤人嘅第六房妻子，但其實歷來都冇咁樣寫過，反映「第六房」同「賤」都係形容「內人」，而且「賤內」係一個好固定嘅用法。好似「拙荊」一樣，係男方自稱妻子嘅固定謙詞，有地位高低之分，可能唔適合現代嘅語境，但並唔代表可以隨意重寫字面意思。
有啲人認為既然「賤內」白話可以譯做「我嘅老婆」，咁「賤」咪即係「我嘅」呢？不如試下套用落其他詞：「賤人」、「賤民」、「賤種」，邊一個可以解做「我嘅人」、「我嘅民」、「我嘅種」？
語感唔通，證明「賤」係呢種構詞唔係人稱代詞，亦唔係表示擁有權。「賤」多數只係形容詞，用嚟表示身份地位低下，好似「犬子」、「敝校」、「寒舍」都係呢種結構，「犬子」唔係講隻狗嘅仔，而係用嚟貶低自己個仔，通過貶抑嚟做到自謙嘅效果。
臺灣嘅教育部話「賤」可以解：謙稱自己的。如：「賤內」、「賤辰」。《戰國策．趙策四》：「老臣賤息舒祺，最少，不肖。」呢句入面「老臣」已經係自稱，再加「賤」如果都係自稱就重複咗，語法上唔合理。
實情係「賤」形容「息」，即係「唔出色嘅細仔」。一旦拆清楚構詞嘅方式，所謂「賤＝自己的」就站唔住腳，「賤」解「謙稱自己的」係一個語言環境下嘅結果，唔係「賤」本身就可以解「自己的」，呢樣更加證明要靠自己查證、分析、唔盲信。
最後要問：如果「賤內」本身有貶義，咁我哋重應唔應該用？
呢個問題唔係靠翻案可以解決。如果用現代觀念睇古語只係自欺欺人，不如承認歷史再去做呢個時代嘅反思。謙詞本質上係自貶，但當中涉及到貶低妻子，今日聽落就未必適合再用。但要用定唔用，都唔應該建立喺誤解上，而係要基於對歷史語境嘅理解。語文學習唔係淨係求創新，更要識得尊重語言本身嘅結構同歷史，先可以真正睇清楚，點樣去講，先唔會講錯。
學識會員