點解日文會一字多音？

日文訓讀音呢家嘢，查實有段古：首先日語唔屬於漢語，而係屬於日本- 琉球語系，同粵語等嘅漢語唔同源；喺遠古時代，現代日語嘅祖先獨立噉喺日本列島發展，本身已有一定量嘅本土詞彙，呢啲字詞同漢語入便嘅好唔同；由大約 5 至 6 世紀起（唐朝始於 7 世紀），日本開始勁同古代唐人交流，大受漢語（尤其係唐同宋嘅中古漢語）影響，亦都引入漢字。

漢字有樣嘢好特別，就好多時都只表達意思，尤其係啲象形字—金同水等漢字嘅字形，並冇提供到任何有關「隻字要點讀」嘅資訊，於是就出咗種情況，日本人見到一隻漢字嗰時可能會跟中古漢語嗰種讀法嚟讀，但又有可能會讀做同嗰隻漢字一樣意思嘅本土口語字詞。

例如水噉，想像有一個 7 世紀嘅日本人，佢望住張紙上便寫咗水呢隻漢字；

佢可以跟中古漢語噉讀—即係 sui 呢個漢音嘅前身；

但佢又可以將隻漢字讀做佢本土語言入便指水嗰隻字詞—即係 mizu 呢個訓讀音嘅前身；

最後，就形成咗現代日本話對漢字「有分漢讀定訓讀」噉嘅情況。

如果搵一個以英文做母語嘅白人，教佢中文字嘅意思但唔教讀音，然後睇佢用「英文式訓讀」嚟讀中文字嘅話，會唔會出現噉嘅情況呢？

我想飲飲水。—— Ngo5 soeng2 jam2 jam2 wot1 taa4.

生火煮飯。—— Sang1 faai1 aa4 zyu2 faan6.

個月亮好大好圓！—— Go3 mun1 hou2 daai6 hou2 jyun4!

我哋準備慶祝萬聖節。—— Ngo5 dei6 zeon2 bei6 hing3 zuk1 haa1 lou1 win1.

想知更多得意資訊，可以睇睇粵語維基嘅「訓讀」詞條。

-

對於日文有興趣，但睇完呢篇文章仲係對「日文有唔同讀音」無咩概念？可以試下由入門嘅日語課程開始一步步認識！

【日本語入門課程・初桜】