老子《道德經》入面描述左一個「小國寡民」既理想社會，入面人人過住低技術、低文明，但又幸福快樂既生活。從現代人角度睇，呢個理想似乎係不切實際，唔通原始生活比文明世界更幸福？
其實所謂既「小國寡民」並唔係無政府既原始狀態。呢個「小國」仍然係一個 社會政治 秩序。係小國入面，人人「甘其食，美其服，安其居，樂其俗」，可見小國係由人自然既經濟文化活動構成，人人接觸到既都係自己熟悉既文化環境。小國接近於自然社會，例如部族、村落。
老子認為大國同小國唔只係體量上既差距，仲有本質上既分別。維繫大國既唔再係人自然既經濟文化活動，而係一套建基於形名、宗法同官僚既權力機器，叫做「天下神器」。
「天下神器」將原本自然開放既世界變成一個可以被佔據、擁有既工具，將世界變成「天下」。自始統治者可以爭天下、得天下，然後將天下分封俾諸侯、士大夫，成個世界變成一家一姓私有既財產。
呢個天下並唔係為保障人民自由同利益而組成既共同體。人民存在既唯一價值就係納稅、服役，佢地只係機器既一部分。自古以來，邊個得到天下，就得到天下人既供養。乾坤再造、天下易主，對人民黎講只係收稅既人唔同左，佢地從來無通過國家實踐過自己既自由同意志。
從呢個角度睇，老子既「小國寡民」其實係挑戰緊大國乃至天下既 合法性。既然國家既存在唔係人自然自發形成既共同體，而係僭建係自然社會之上既 權力機器，佢仲有無存在既必要？
當然老子並唔係提倡革命。老子認為所有「不自然」既野，到最後都會自我崩解。所以老子話「將欲取天下而為之，吾見其不得已。天下神器，不可為也，為者敗之，執者失之。」通過歷史可以總結出，任何以為自己可以得天下既人，最後都會被其他人推翻，歷史發展到最後一定會逐漸趨向自然狀態。
從現代角度睇，的確尊重人自然權利既 共和體制 逐漸取代王權成為主流，現代人比古人享有更大既自由，但與此同時，全球化既「資本-技術-權力」復合體亦都有空前既力量去建造一台「世界神器」。如果當下大國既博弈邏輯係爭奪世界神器既控制權，咁老子哲學可能預示着，一個更宏大既歷史邏輯在於「中心化」同「去中心化」既博弈。只有尊重自然、自由既一方，先會成為最後既歷史選擇。
想知道更多 道家思想 對現代人生存狀態既反思？歡迎修讀《道家哲學之不自然人類研究中心》，影片課程外仲有每月網聚，帶大家從日常生活領略 哲學智慧。
學識會員