William 吳偉賢博士

發下夢，假如政府想鼓勵維港兩岸單車代步，考慮發展單車渡輪服務，模擬唔同碼頭選址，睇下邊度起會鼓勵多啲人踩單車，好嘞，終於選定咗，起咗，仲好成功，於是再起，終於起到好旺場，踩單車消閒當然有，踩單車返工都有，連預計唔到咁旺嘅踩單車送貨都有。

六十年代香港，市區已經到處人多車多，人口年年十萬十萬咁加，工廠係咁起，但馬路就起得慢，尤其係觀塘填海填出黎個大塊地，加埋啟德機場跑道移位騰空出黎個新蒲崗，兩個工業區起廠起樓到密麻麻，車塞人塞，烏煙瘴氣。九龍另一邊嘅深水埗長沙灣，一路去再遠啲嘅荃灣，都係發展興旺嘅工業區住宅區，到處車水馬龍。

八十年代之前，城市同交通規劃無乜系統協調。八十年代天水圍同將軍澳選址，就一早考慮咗交通網嘅佈局，不過成效點就真係眾所周知嘞。