試當真都有數學家？新show賣飛玩「荷蘭式拍賣」？

近年黃牛問題嚴重，搞到好多人都買唔到show飛。日前，人氣急升嘅試當真，宣佈喺Star Hall開show，而佢哋嘅賣飛方法，可能有機會解決到呢個問題！

今次試當真Live Show嘅票價全場劃一，但係價錢就每日都唔同，由8月9日嘅 $10000一張，慢慢下降到去9月1日嘅 $10。即係話，如果有Fans真係好想入到場，但係又驚班黃牛黨搶晒所有飛，佢就可以喺早啲嘅時間買飛。由於日子越早，價錢就越貴，所以市場需求都唔會好大，Fans就係用錢去換取更高嘅機會率去買到飛。

呢種賣飛嘅玩法，其實係同「荷蘭式拍賣」(Dutch Auction)非常相似，亦都同博奕論(Game Theory)有關。試當真作為遊戲設計者，佢有冇方法可以設計到一種賣飛嘅方法，係會令自己嘅利益變得更多？ 喺歷史上有好多呢種成功嘅「遊戲」例子，例如大家都聽過嘅囚徒困境(Prisoner’s Dilemma)之中，警長透過出口術，令到佢喺唔夠證據嘅情況下都引誘到兩個疑犯認罪，而最大化咗自己嘅利益。

試當真採用嘅呢種賣飛方法，其實都係透過玩家之間嘅不信任，去增加自己嘅收益。你諗下，如果我哋團結一心，全部Fans一齊去到9月1日先一齊買飛，大家都可以用超平嘅價錢，去睇到我哋嘅偶像！ 但係問題嚟啦，你係咪識晒所有試當真嘅Fans，而又能夠確定佢哋會信守諾言，唔會偷步早幾日去買飛？ 例如8月23日嘅票價都只係$100，係一個非常affordable嘅價錢。如果我同一大班Fans下咗9月1日先一齊買飛嘅諾言，之後偷步喺8月23日買飛，我係咪同時減低咗買飛嘅成本，同埋增加咗買到飛嘅可能性？ 所以喺呢種情況下，呢種玩家之間嘅合作基本上係好高風險，因為自己隨時可以因其他人違反諾言而買唔到飛。而結果，就好可能係大家都會傾向用一個較高嘅價錢去買飛，因為呢個係唯一可以喺唔同其他玩家合作嘅前提下，增加自己買到飛嘅可能性。當大家都計到最盡嘅時候，我哋就會到達一個動態嘅平衡點，叫做納殊均衡(Nash Equilibrium)。呢次試當真都真係好醒目，用一個咁有趣嘅賣飛方法去增加收益，令到我哋睇得出Game Theory同埋數學真係同日常生活好有關！

畀兩個思考問題大家諗下，除左Fans之外，黃牛黨都係呢次「荷蘭式賣飛」遊戲嘅玩家。相比起傳統嘅賣飛方法，你哋覺得「荷蘭式賣飛」對於黃牛黨係更加有利定係相反？點解？另外，黃牛黨應該用咩策略去搶飛，例如係早啲買大量飛，定係遲啲買少量飛？ （當然唔係鼓勵大家去做黃牛黨啦，但係如果我哋諗到黃牛黨會用嘅策略，我哋就可以反其道而行！）