AI 會唔會令到人腦「變薄」？

最近大家成日講 AI、講到學生用 ChatGPT 做功課唔再用腦，令到學界開始擔心：AI 代替人類思考，會唔會搞到人腦「退化」？

拆解：腦用得多，先至會變得更「聰明」！

呢個恐懼其實都幾到位㗎！

用進廢退：認知神經科學等領域嘅研究表明，腦就好似肌肉噉，用得多，畀多啲刺激佢，個腦先至會健康會強壯！如果咩都交晒俾 AI 搞掂，你個腦咪等同於「瞓咗喺度唔郁」？

呢種現象，甚至仲可以喺細胞層面觀察得到！神經元係神經系統最基本嘅組成部份，而海伯理論 (Hebbian theory) 相關嘅研究就有提到每當一對神經元持續噉一齊射訊號，佢哋之間就會出現一系列嘅生長或者代謝變化，令到佢哋之間嘅連繫變強，令到個腦有能力隨經驗變化，達致學習。

相對嚟講，某啲腦區嘅神經元長期唔受到刺激，就會加快速度死亡。而醫學證據表明，用得腦多，多啲接受唔同嘅認知刺激，可以減低腦退化發生嘅風險！例如有研究就指，得閒會玩解謎遊戲嘅老人家，冇咁易出現腦退化！

腦要用得多，先至會變強，呢點喺細胞層面都睇得到，而且研究指用腦用得多，可以減低腦退化嘅風險。而近幾年有研究指，用 AI 代替自己思考會減少人用腦嘅「力度」，真係有搞到自己腦部變弱之虞！

諗下自己嘅個人經驗

你哋有冇試過將某啲思考工作交畀 AI 或者其他人做？例如要安排旅行嘅行程、寫 email 嘅措辭、或者寫文章等等。

後來自己嘗試親自做返嗰樣思考，有無發覺好似難咗、慢咗、要「撻」好耐先至郁到？噉會唔會係表示你個腦處理嗰方面嘅工作嘅「硬件」因為太耐冇用而弱咗？

嚟緊下次AI月會再講吓。