Sora 2 由模型走入社交：全AI短片平台Sora引發熱潮

OpenAI 利用旗下嘅 AI影片 生成模型 Sora 2，推出一個只容許 AI 生成影片內容嘅 iOS 社交媒體應用程式，名為 Sora。平台主打 10 秒寫實短片，支援二次創作同 Cameos（用戶以自己樣貌或聲線製作 AI 影片）。呢個新發展，唔單止關乎 影音創作，仲係成個內容生態嘅新嘗試。

Sora 嘅定位係「全部影片皆為 AI 生成」嘅短片平台。暫時只係喺美國同加拿大地區開放下載。根據 Appfigures 數據，Sora 上線第一日下載量約 5.6 萬次，即刻排到美國 App Store 綜合排行榜第三，幾日內更升到第一位，短短五日已突破 100 萬次下載。相比之下，當年 ChatGPT App上架嘅首日下載量只係幾萬級別，升幅遠不及今次 Sora，反映短片生成結合社交嘅吸引力更大。

Sora 嘅出現，無疑標誌住影音內容創作方式出現真正改變：以前要喺其他 AI 平台整片，再放上 社交媒體；而家一個 App 入面就可以完成創作、發佈、二創互動，成個流程快好多。輸入一句 prompt 就可以生成短片，AI 影片創作唔再係遙不可及嘅事。學生、創作者、任何人都可以參與其中。OpenAI 亦計劃同授權公司合作，畀擁有 智慧財產權 嘅創作者 共享營收收益。

新發展明顯帶嚟新潮流，但同時機遇與風險亦都並存。好處係參與度更廣；風險就係錯誤資訊同深偽內容更易擴散。例如，有人用 AI 二創已故演員羅賓威廉斯 (Robin Williams) 同喜劇演員喬治卡林 (George Carlin) 嘅片段，引起唔少爭議。好萊塢著名經紀公司 Creative Artists Agency (CAA) 喺 10 月 9 日表示，Sora 對藝術家構成「重大風險」。

OpenAI CEO 阿薩姆·奧特曼（Sam Altman）其後喺部落格回應，承諾會畀版權擁有者 更精細嘅控制權，包括電影同電視工作室在內嘅持有人可以 阻止旗下角色出現 喺 AI 生成嘅內容。最新方向重由原本嘅「預設可用、權利人退出」改為「權利人主動同意 (opt-in)」。另一方面，所有生成影片亦會自動加上 可見同不可見水印，同埋 C2PA 來源標記，方便追蹤來源（雖然有媒體指出，可見水印仍有機會被移除）。

CAA 表示會繼續聽取 OpenAI 嘅方案，並同智慧財產權公司同相關行業協會合作。可以預期未來會有更加完善嘅版權制度。如果能夠好好規管，Sora 2 唔止係娛樂平台，重有潛力成為 批判思維訓練 同 知識普及 嘅新工具。