基督徒可唔可以參拜神社?

基督徒可唔可以參拜神社唔單止係香港基督徒去日本旅行時會遇到嘅問題，仲係日本基督徒一直面對嘅難題。呢個問題唔單純因為神道同日本文化分唔開，仲牽涉到敏感嘅政治同歷史問題。

要搞清楚參拜神社嘅問題，先要了解日本近代社會政治環境下神道教嘅角色。從明治維新到日本戰敗投降，神道唔係一般嘅「宗教」，而係被視為軍國主義意識形態嘅一部分，叫做國家神道。所以，參拜神社被當成「愛國」嘅義務。喺呢個背景下，好多日本基督徒都有參拜神社。例如1942年，日本基督教團總理富田満牧師居然去咗伊勢神宮參拜，向天照大神報告日本基督教團成立；1932年，三位上智大學學生因為天主教信仰，喺強制軍訓時拒絕上級要求去參拜靖國神社，結果惹怒軍部，被批評「不忠君愛國」，甚至威脅要禁止天主教。喺1936年，教宗庇護十一世頒布《信徒對祖國的義務》訓令，准許日本天主教徒以「忠君愛國」為由參拜神社。但係，當代天主教神學家西山俊彦神父（1935-）認為，由於呢個訓令係喺軍國主義壓力下頒布，而神社確實係祭祀其他神靈，違反教理，所以應該取消。因為國家神道嘅歷史，戰後每次有內閣官員參拜靖國神社或伊勢神宮，都會受到日本天主教正義和平委員會、日本聖公會同日本基督教團嘅反對聲明。

問題在於，戰後日本社會實行政教分離同世俗化，法律上國家神道已經唔存在，而民間多數人只視神道為日本文化風俗嘅一部分，例如新年嘅初詣、兒童嘅七五三祈福同成人式，都喺神社舉行。如果日本基督徒堅決唔去神社，喺日本呢個集體主義社會可能會被視為怪人而被排擠。咁基督徒應該點做？

作為宗教哲學家，我喺日本去過嘅神社同佛寺遠比教堂多。對於「參拜神社」嘅問題，我今年初喺《時代論壇》寫咗一篇〈日本基督徒參拜神社問題〉，提出以下建議畀大家參考：

第一，繞過鳥居。日本人入神社經過鳥居時一定會鞠躬，以示敬神，但基督徒為咗避免拜偶像嘅嫌疑，唔應該鞠躬，直接行過鳥居。如果怕咁樣對其他日本人唔禮貌，而空間允許，就繞過鳥居去神社，或者只係好似同人打招呼咁輕輕點頭，表示自己唔係將對方當神，只係入人哋屋企時點頭問好咁簡單。

第二，手水。喺手水舍洗手可以照做，但意思只係出於禮貌，清潔自己先入人哋屋企，而唔係話自己嘅污穢可以靠呢啲水除去。

第三，唔拜。如果唔係公務，唔應行近本殿祈禱，只可以遠遠觀看。如果係公務（例如為新單祈願或公司活動），都唔好投幣、唔好拉繩、唔好做「二禮二拍手一禮」，只係企喺一邊，靜靜等同事祈禱完。

第四，唔寫繪馬。繪馬係向神靈祈求，所以唔應該寫。

第五，可以攞御朱印。雖然御朱印通常會喺書法上寫「参拝」，但如果攞御朱印嘅人無參拜嘅心，只係畀500円攞呢個紀念印章，蓋喺御朱印帳上，無乜唔妥。而且宮司好認真咁喺御朱印帳上寫書法同蓋印，代表宮司嘅祝福，純粹係人與人之間嘅禮儀，無拜其他神嘅意思。

簡單黎講，只要用尊重差異同參觀嘅心態去神社，就唔使擔心拜偶像同政治意識形態嘅問題。如果想了解更多關於神道嘅問題，歡迎報讀「日本信仰文化入門」課程！