日本人唔關心宗教？

日本被基督宗教視之為「福音石頭地」；自聖方濟．沙勿略四百幾年前來日傳教，經歷江戶幕府禁教，明治維新解禁，去到今日，全國依然只有唔夠1%人係基督徒。其中一個解釋原因往往係「日本人（尤其年青人）唔關心宗教」。

但係依個係咪真相呢？正好相反，「神」係日本流行歌經常出現嘅主題。例如 櫻坂46、由 森田ひかる center嘅《BAN》副歌就有一句「神様　何がいけないんですか？どこがその基準なのか知りたい」（神啊到底有乜係唔做得？我想知到底標準喺邊！）；日向坂46 小坂菜緒 center嘅《世界にはThank you！が溢れている》亦有一句「神に祈り捧げるように 僕に叫ばせてくれよ」（好似向神祈禱咁比我大聲呼叫）；乃木坂46 由 大園桃子、久保史緒里、山下美月 及 与田祐希主唱嘅《言霊砲》更加第一句就問「神様は誰の味方？」（神你撐邊個？）

所以真正嘅問題，唔係日本人唔關心宗教，而係日本人對「神」嘅理解同西方差異好大：日本人理解嘅神唔係基督宗教嗰種作為創世同審判者嘅超越嘅上帝，而係世界嘅一部分：神係存在喺自然同人間之中，唔係一個高高在上嘅權威。正係因為咁，所以《言霊砲》可以質問「神」你撐唔撐我，《BAN》可以質問「神」到底道德標準何在。

如果唔理解現代日本人對宗教嘅理解同基督宗教嘅落差，就無法解決日本係「福音石頭地」依個問題。「日本信仰文化入門」係由現代日本流行文化切入，介紹儒家、神道同佛教對當代日本社會嘅影響，正適合關心日本嘅大家報讀。