日本文化＝規矩多多？

日本比人嘅印象往往係「保守」嘅禮教社會。神社、佛寺故然規矩多多，敬語嘅使用令社會存在明顯嘅先輩後輩之分，甚至連流行文化都講「歷史傳統」，要論資排輩。 乃木坂46 13週年演唱會上，38單曲中心成員中西阿魯諾（中西アルノ）只不過講咗句「雖然我唔算好理解乃木坂46十三年嘅歷史，但係我相信依家嘅乃木坂係最強」，就立即被日本嘅黑粉鬧到飛起，話佢無大無細、唔尊重前輩之類，令香港嘅乃木坂粉絲睇到一頭霧水，唔知大家鬧乜。

但係日本文化，即使係傳統信仰，並唔係只有固步自封嘅一面，而係好似 櫻坂46 第六單曲歌名咁講，不斷「Start Over」。今日日本佛教嘅「肉食妻帶」，正正就係幾百年前日本淨土真宗嘅「Start Over」。日本儒家古學派開創者伊藤仁齋甚至否定朱熹嘅「四書」，認為只要讀通《論語》同《孟子》就可以解得通六經，又係一種「Start Over」。而日本嘅傳統信仰，更透過日本流行音樂，至今依然繼續同現代社會對話，不斷推陳出新，回答超越時代嘅哲學問題。本來係佛教用語嘅「自業自得」變成咗櫻坂46第八單曲嘅歌名，去講述人點樣自作自受；同一單曲所收錄嘅unit曲「縁起担ぎ」質疑有無命運存在，第二單曲「Ban」反問神明所謂禁忌嘅標準何在，等等。透過守舊同創新、傳統與現代思想不斷衝突，日本文化先形成今日嘅面貌，就好似乃木坂咁不斷換人、改革同時承傳歷史一樣，維持活力。

如果想透過日本流行文化認識日本傳統信仰，請立即報名！