上星期先啱啱介紹新太空競賽，跟住過去一星期就有 碟仙（DeepSeek 連登譯名）推出新模型媲美美國頂尖 AI 水平，而且據稱用咗非常之低嘅成本就做到，震撼全世界。呢個事件已經有好多人評論，我就唔再多講。我反而只係想再講講歷史。
回顧二次世界大戰期間，納粹德國 嘅科技其實亦曾經喺一啲領域超越英美，例如首先發明火箭技術。然而，政治環境導致對猶太人及女性科學家嘅迫害，包括最出名嘅愛因斯坦、馬克斯·玻恩（Max Born）、麗澤·邁特納（Lise Meitner）、赫塔·斯彭納（Hertha Sponer）等多位傑出科學家選擇逃離德國。呢種人才流失，令納粹德國喪失咗原本嘅科技優勢（起碼係部分原因）。相反，佢哋對歐美嘅科學發展卻產生重大影響。
同樣，蘇聯亦曾面臨類似嘅情況。例如喬治·伽莫夫（George Gamow）選擇逃離蘇聯，之後都對美國嘅科學技術發展有一定貢獻。但可惜嘅係，要離開蘇聯可能比納粹德國更困難，因此，有更多嘅傑出學者留喺蘇聯工作，但佢哋嘅研究工作最終亦受到政治壓力影響。例如，尼古拉·瓦維洛夫（Nikolai Vavilov）、列夫·朗道（Lev Landau）、安德烈·薩哈羅夫（Andrei Sakharov）、瓦列里·萊加索夫（Valery Legasov）等多位傑出科學家或工程師，皆受到政治環境所逼害或影響。
其實 政治制度 或 社會文化 亦都曾經影響歐美嘅傑出科學家。最出名嘅就包括近年電影介紹過嘅羅伯特·奧本海默（Robert Oppenheimer）及艾倫·圖靈（Alan Turing）。
呢啲實例顯示，政治制度未必一定會限制一個民族產生優秀嘅人才，但政治及社會環境可以嚴重影響佢哋嘅自由發揮，甚至迫使佢哋離開自己嘅國家，投向其他陣營。因此，我哋並唔應該驚訝一個人口眾多嘅國家能夠出現傑出人才，產生傑出創作。但要做到真正嘅整體 科學進步，除咗喺已知嘅 實用研究 議題外，必須有人研究各種並不受關注嘅 基礎理論，不受由上而下嘅指導，純粹按自己研究興趣而探索，先可能發現意想不到嘅創新知識。要製造到一個咁樣嘅開放同自由嘅研究環境，冇所謂嘅禁忌，吸引各種人才大膽創新，可能先至係決定 科技競賽 勝負嘅關鍵。
想認識多啲關於AI? 立即去睇下 AI 時代的入門知識
學識會員