詞係宋代專利？

我哋成日開口埋口「唐詩宋詞」，似乎認定咗詞只係宋代嘅產物，同其他朝代拉唔上關係，更加係同現代脫節。但係呢種講法係錯嘅——早喺唐朝已經有詞作出現，唐代最出名嘅詞人非晚唐溫庭筠莫屬，一句「照花前後鏡，花面交相映」，成為千古絕唱。就連詩仙李白都有詞作傳世，不過佢嘅詞作係咪佢本人所寫就仍然有爭議。但至少我哋可以肯定，「詞」呢種文體喺唐朝一早已經存在，由唐代一直到《花間集》嘅五代詞人、南唐嘅三大詞人，詞壇喺宋代之前已經經歷過唔少發展，誕生出好多詞壇嘅大文豪。

宋代之後，詞嘅創作仍然未消失。雖然詞學喺明代曾經衰落過一段時間，但都唔代表詞畀人放棄咗。「滾滾長江東逝水，浪花淘盡英雄」，呢首〈臨江仙〉就係喺明代寫成㗎喇。而喺清朝，詞學復興，迎來第二個高峯。大家喺Facebook、IG成日見到嘅「人生若只如初見」，就係清代納蘭性德所寫嘅一首詞嚟。民國以後，寫詞嘅人似乎少咗，但直至今日，香港都重有好多出色嘅詞作。可想而知，詞係一種歷久不衰嘅文體。「唐詩宋詞」呢個term所指嘅係詩同詞喺文學史上發展嘅高峯時期，而唔係話詩係唐代獨有，詞亦都唔係宋代嘅專利。

今次呢個course，我哋會讀專注喺南唐詞。南唐喺中後期國力比唔上周遭嘅國家，連君主都長期處於恐懼、不安之中，而後主李煜去到後期連叫自己做「皇帝」都唔敢，要自貶身價，換取短暫嘅和平。喺一個咁嘅亂世之中，詞人亦都大受呢種氣氛影響，寫出嚟嘅詞一方面沁人心脾，係可以療癒心靈嘅文字；另一方面，呢啲詞作或多或少都有政治隱喻，詞人擔心社會嘅命運、國家嘅未來。香港經歷疫情同多次風波後，亦只見一片愁雲慘霧。讀南唐詞正好能夠抒發我哋心中嘅無奈、憂傷之感，同千年以前嘅人互相傾吐心聲，係調整心情嘅妙方。