👤蘇格拉底同古代中國哲學有咩關係？

話說好耐好耐以前，有個好識詭辯嘅人，佢叫宮酸濃 (化名)，佢身處嗰座城嘅主公下咗令，所有馬一律唔准離城。於是宮酸濃就騎住一隻白馬出城。城門嘅守衛一見到宮酸濃，就截住佢，話馬唔准離城。宮酸濃就話：

「我騎住嘅係白馬！白馬同馬唔係同一樣嘢！所以白馬非馬！」

啲守衛聽到，呆咗唔識答，就死死哋氣噉畀宮酸濃騎住隻白馬離開。

白馬非馬嘅故事好出名，全東亞都有人講。好多現代哲學人都認為，呢個故仔展示咗定義係幾咁重要。

定義一個字詞，可以理解為「講清楚個字詞係咩意思」或者「畀出一段語言，清楚冇歧義噉分辨每一樣嘢係咪屬於嗰個字詞所指嘅嘢」。哲學家分析事物嗰陣，第一步往往係要搞清楚個概念嘅定義，據講蘇格拉底就曾經噉講：

「要長智慧，首先就係要識定義啲字詞。」

英文版：”The beginning of wisdom is the definition of terms.”

唔搞清楚啲字詞嘅定義，成日都會引起謬誤。睇返白馬非馬個故仔，就係源於冇搞清楚定義。個謬誤簡單講如下：

白馬有白色呢一樣馬冇嘅特徵， 如果話白馬係馬，噉兩樣嘢特徵應該完全一樣，所以白馬唔係馬。

呢一個論證可以噉分析：無論係上古文言定係現代粵語，「A係B」呢句嘢有至少兩個可能意思，可以指

A 同 B 係同一樣嘢（兩樣嘢特徵完全一樣）又或者係

A 係 B 嘅一種。

白馬同馬的確唔係同一樣嘢，但係白馬係馬嘅一種，所以「白馬係馬」呢句嘢喺第一個意思上唔合理，但喺第二個意思上係合理嘅。喺白馬非馬呢個所謂嘅論證當中，講嘢嘅人撈亂咗「白馬係馬」嗰兩個可能意思，就出咗個荒謬結論，話白馬唔係馬。

現代哲學人好重視批判思考。而佢哋批判其他人嗰時，好多時就係批評對方冇搞清楚字詞嘅定義，或者用埋晒啲意義不明嘅字詞。好多重要嘅概念——例如係自由意志、因果關係同埋公義... 等嘅概念，具體定義都有爭議性，唔少哲學家都會著墨分析呢啲概念嘅定義。

上文所講嘅宮酸濃。你估吓佢原名係咩？

想知更多有關定義嘅資訊，可以參考吓粵語維基，仲可以考慮吓報讀Hok6嘅哲學課程！

預售影片課程【西方哲學史(一)】，帶你認識蘇格拉底在內眾多西方哲學家的哲學思想！

〈西方哲學史〉系列三個課程【西方哲學史一】 【西方哲學史二】 【西方哲學史三】。