🌐諾貝爾獎頒俾人工神經網絡嘅教父？

2024年嘅諾貝爾物理學獎頒咗俾 John Hopfield 同 Geoffrey Hinton 呢兩位人工神經網絡嘅教父級人物。而化學獎亦啱啱新鮮出爐，有一半亦係頒俾人工神經網絡近年嘅傑出人物 Demis Hassabis 同 John Jumper。呢幾位人物可以話代表咗人工神經網絡嘅三個唔同發展階段。

人工神經網絡係模仿人腦神經網絡運作嘅數學模型，係人工智能嘅其中一種方法，最早喺1950年代已經出現。到咗1980年代，John Hopfield 提出咗 Hopfield 網絡，用嚟處理聯想記憶，為人工神經網絡打咗基礎。但神經網絡經歷咗好幾次嘅低潮，去到上世紀末，曾經已被認為是沒有出路的方案。原因之一係當時嘅電腦運算能力冇辦法大規模咁使用神經網絡。

去到本世紀初，電腦運算能力提高咗好多，正好，Geoffrey Hinton 作為深度學習（即多層次嘅神經網）嘅重要推手，證明人工神經網絡嘅威力，令到人工智能喺近年嘅應用變得越嚟越普及。

而 Demis Hassabis 同 John Jumper 今次獲諾貝爾化學獎嘅原因就因為應用咗人工神經網絡去做科學研究，去推測蛋白質嘅化學結構。不過 Demis Hassabis 最出名嘅可能係佢作為 AlphaGo 背後嘅重要推手，2016年喺圍棋上人工智能第一次打敗人類頂尖高手。今次獲獎嘅應用程式 AlphaFold 係佢一系列人工神經網絡應用嘅延伸。

呢幾位學者喺人工智能嘅發展路上嘅地位毋庸質疑。不過話雖如此，將諾貝爾物理學獎同化學獎頒俾研究人工神經網絡嘅學者似乎引起咗唔少爭議。傳統上，物理學及化學主要係研究自然界嘅基本定律同現象，而人工神經網絡屬於工程學應用及數學計算範疇。呢種應用性強嘅研究應唔應該喺純科學範疇得到咁高嘅榮譽呢？當然，支持者可以認為，Hopfield 同 Hinton 嘅研究本質上係探索複雜系統嘅物理行為，同樣值得得到物理學界嘅認可。而AlphaFold喺化學應用上亦的確令化學有重大突破。絕對係值得獲獎嘅。

總之，今年諾貝爾獎嘅決定，或許正顯示咗現代科學越嚟越跨領域，打破咗傳統學科界限。要喺21世紀獲得成就，就要對各種知識作出整合。