農曆係陰陽合曆
其實傳統中國曆法（暫且稱之為農曆）被稱為陰曆並唔恰當。因為農曆係根據太陽同月亮嘅運行位置而編制，並非只係按月亮（陰）嘅位置而定，所以農曆其實係陰陽合曆。簡單嚟講，農曆上，年嘅時間係跟太陽，月嘅時間係跟月亮。以下我哋相比一下，就會更加容易明白。
公曆係陽曆
現今國際通用曆法(即Georgian Calendar)主要參考太陽，年嘅時間跟太陽軌跡而定。四年一閏同其他嘅微調，目的都係想修正每年日期相對於太陽運行軌跡位置。12個月份嘅長度只係約略相等於月相盈虧嘅時間（約為29.5日），但事實上一年（即地球繞日嘅時間）其實平均會經歷12.3次月相嘅盈虧。大家可以想像，每年12個月嘅開始日期就會同月相有好大嘅落差。所以喺公曆裏面，有啲月份嘅1號會係新月，有啲月份嘅1號會係滿月。
伊斯蘭曆先係陰曆（Lunar Calendar)
伊斯蘭曆就以月相作為主要參考。月份嘅日期當然跟足月相盈虧，每12個月為一年。但咁樣每年就只有大概354日。於是，伊斯蘭曆每年嘅開始日期會相對於太陽軌跡嘅唔同位置，而且每約32.6年就會比起公曆多咗一年。所以睇伊斯蘭世界嘅歷史要好小心，隨時計錯年份。除咗呢三種曆法之外，呢個世界當然重有好多其他曆法，大多以陽曆或者陰陽合曆計算，所以農曆只係其中一種陰陽合曆。將農曆新年叫做Lunar New Year ，首先已經唔啱。而且就算改叫「陰陽合曆新年」，好似都唔係咁政治正確──點解淨係農曆就代表晒陰陽合曆㗎？！咁其他使用陰陽合曆嘅曆法咪被代表咗？
咁農曆係咪應該叫中國曆 (Chinese Calendar)呢？
筆者亦唔係太同意。
眾所周知，唔止淨係中國人會用農曆 （韓國、越南等地方亦會自己編制）。除此之外，農曆本身都唔係中國人獨創嘅。中國歷史上，曆法其實好多朝代都有修改計算方式，下次有機會再詳細講。但筆者今次主要想指出，今日所用嘅農曆，其中一次重大嘅修改係喺明末清初，由西方傳教士將當時天主教庭承認嘅天文數學模型，第谷嘅半日心模型及其計算方法引入農曆，稱為「時憲曆」，令到農曆嘅節氣計算變得準確。所以如果覺得農曆係由中國人獨創嘅，一定要稱為中國曆，呢一點似乎都唔係咁成立。
建議稱為農曆
其實筆者自小一直都係叫農曆。農曆呢個叫法主要原因是傳統曆法喺預測農民需要知道嘅各種資訊上（正正包括節氣）非常有用。因此民國初年官方改用公曆後仍繼續喺民間使用。呢個叫法既客觀又冇政治爭議。今日我哋所用嘅公曆，我哋都好少會叫做西曆，又何必執着於將中國人對世界嘅小小貢獻上面，一定要加「中國」兩個字上去，顯得咁小氣呢？
至於英文就好似冇一個相應於「農曆」嘅叫法。大家認為正確嘅中英文叫法係點呢？不妨留言分享下！
學識會員