電腦有冇可能擁有情感？

如果我話俾你知，其實早喺二十世紀初，computer 已經有感情，仲肯定係有自我意識嘅添，你會唔會好驚訝？冇呃你，事關其實 computer 呢個字喺當時唔係指電腦，而係指一種真人做嘅工作，內容係以分工形式好機械式咁樣計啲好繁複嘅數，譬如一個人只係不斷計好多個位嘅加數，另一個人只係不斷計除數。儘管成隊人一齊計緊嘅數可能可以好高深，但係每個做呢份工既人所分拆咗出嚟負責計嘅只係啲基本嘅數學運算，每日按照上頭嘅指示計完又計，仲要係自己未必知計嚟仲乜。呢份工作，喺digital computer出現之前，就係computer 嘅原意。

喺20世紀初英美呢啲先進國家，無論係軍事上定民用上，都越嚟越需要運算能力，於是就會請好多呢啲computers去幫手處理計數。由於呢種工作繁複沉悶，只需要高度專注力，所以儘管算係智力工作，但其實對執行者嘅知識要求唔算高。英美國家當時教育已經相對普及，於是乎可以請到好多有基本語文能力（識得睇指令）同基本數學能力嘅人去做computers，而且通常係低下階層先會做。

二戰開始之後，由於男性上前線打仗，呢種唔使體力勞動嘅工作就交咗比好多女性去做，例如曼克頓計劃就有大量嘅女性做computers。幾十年前男女唔平等嘅年代，computers呢種工作能夠讓更多低下階層嘅女性出來打工，可能已經算係一種進步。但係因為computer嘅工作實在太繁複沉悶，以致當時嘅流失率好高，甚至引發好多酗酒及精神心理問題出現，導致人肉 computers 既可靠性並唔係咁高，呢個情況要到1950年代digital computers 嘅出現先至得以改變。據說早期嘅digital computer計算速度未必快過呢啲人肉computer，只係digital computer能夠二十四小時工作，而且可靠性更高，所以越嚟越吸引民用公司及政府機構選擇採購。於是Computer呢個行業好快就走入咗歷史。

呢段歷史對今日我哋思考人工智能有冇可能有意識同思想、有冇可能會取代人嘅工作等問題上，有一定參考價值。科技進步令至某啲工作消失，歷史上係不斷發生，人工智能嘅出現唔係特例。50 、60年代電腦開始取代人嘅工作，唔係因為電腦”叻”過人，係因為電腦能夠好可靠咁按照既定步驟不斷去執行一啲計算工作。但呢個似乎唔算得上係智慧既彰顯同意識既呈現，甚至正正係要透過放棄人嘅自由思想，壓抑人嘅情緒，先至可以好穩定咁做得好嘅一種工作。

今日嘅深度學習演算法，無論佢表現出嚟係幾咁有創造性，幾咁有智慧，但我哋知道佢內裏其實最終都只係按照既定嘅步驟去執行指令。演算法有冇可能突然令電腦變成為有創意有情感有意識嘅嘢呢？相反，人又會唔會其實都只係一部運算嘅機器，情感、創意、意識呢啲其實都只不過係幻覺，人大腦深處其實都只係按照既定嘅演算法去運算，只不過我哋意識唔到？筆者無意喺呢度下一個結論，但希望呢段歷史可以比到大家一啲靈感去判斷「電腦有冇可能擁有情感？」