💭21世紀AI時代仲學哲學？

隨著人工智能嘅普及，好多人都認為傳統喺學校學嘅知識已經過時，要學嘅係點樣用 AI 呢啲實用知識。事實又係咪咁？究竟仲返學嚟做乜？學啲乜嘢知識先有用？

我嘅立場係好多以前認為實用嘅知識可能真係會變得冇咁重要；一啲一直被人稱為唔「實用」嘅學科，例如哲學及通識，反而更有實用價值。

哲學教育其實好實用，佢幫助學生培養批判性思維、解難能力，同時亦能夠令學生喺應對現實世界中複雜嘅問題時統合唔同嘅知識。現代社會唔再只係單靠技術知識，獨立判斷同批判性思考成為咗職場重要嘅能力。就算係使用 AI，其實都需要有跨學科嘅理解能力去設計指令，並且有能力去判斷 AI 嘅答案係真係假。

喺科學哲學教育中，學生唔單止學識咩叫「知識」，仲要反思我哋一直被認為係千真萬確嘅科學知識，其實點樣受我哋身處嘅環境同文化影響，呢個過程幫助學生了解唔同文化同乜嘢為之真。詳情可以閱讀我今年出版嘅一篇學術文章 (見參考文章)。

更重要嘅係，喺學校學習並唔只係考慮所學嘅知識本身，而且要考慮一班學生一齊學習嘅成長環境所帶嚟嘅學習機會。學生通過哲學及通識嘅討論，唔單止會學識點樣喺多元嘅環境中聆聽同表達，仲會學識處理同別人價值唔同所引嚟嘅爭議。呢種本身已經係價值教育，喺職場上係一個無可取代嘅優勢。

出過嚟做嘢嘅人都知道，一個好嘅員工唔係淨係需要技術能力，仲要係一個好嘅team player、懂得同唔同背景嘅人相處、判斷真假資訊、綜合分析嘅能力等等。哲學教育未必能夠直接教識你應用某啲具體技能，但可以教你點樣用更寬廣嘅視角去睇問題，理解唔同觀點之間嘅張力。學識批判性思維之後，就唔會輕易被單一立場所牽制，能夠喺工作中更加靈活應變。

有興趣深入了解嘅朋友，快啲報名參加 10月27日 晚，「再 • 見教育」免費講座系列，「哲學在基礎教育」啦！