AI 喺近幾年進步得真係好快，兩三年前嘅AI仲只係幫你寫簡單文章、做基本嘅圖像分析，但而家嘅AI已經進化到一個完全新嘅層次，可以同時處理文字、圖像同語音，甚至同你即時互動，記得你嘅要求提供 個性化 嘅回應。作為一個見證住AI過去二三十年發展嘅人，我自己對AI嘅態度亦有好大嘅改變。我覺得而家學用AI，唔單止係跟潮流咁簡單，而係幫自己打開新思維，改變生活模式嘅一個好機會。
AI嘅潛力：未來係點？
AI喺任何工作範疇同日常生活中嘅應用潛力無限。例如，學生用AI做學習助手，老師用AI設計課程；企業用AI提升服務效率，顧客利用AI選擇服務及產品；甚至視障人士都可以用AI將圖片內容轉換成語音，改善日常生活。呢啲例子都證明，AI已經唔單止係科技界嘅新玩意，仲可以改變普通人嘅生活。
如果將而家嘅AI技術再結合到 人形機械人 入面，未來嘅世界可能真係好似科幻電影咁。想像下，一個機械人可以聽你講，幫你即時解決問題，甚至成為你嘅生活助手或者工作拍檔會係一個乜嘢世界？而呢個未來其實可能只係十年甚至幾年後就會出現。我哋點可能唔立即作出準備？
先了解AI嘅基本概念
其實要學識用AI，唔需要一開始就好專業。先了解啲基本概念，例如「機器學習」係乜、「多模態處理」有咩用，點解AI生成內容有時會出錯。了解清楚AI嘅能力同限制，咁樣喺用嘅時候你會更加得心應手。
親自試下市面嘅AI工具
現時好多 AI工具 都好易用，例如ChatGPT、MidJourney或者一啲AI寫作助手，你完全可以免費或者用低成本訂閱試下。試吓用AI幫你寫電郵、做報告摘要，甚至設計一張簡單嘅海報。要真係用，唔好淨係當佢係玩具咁嚟試。當你親身感受到AI可以幾咁快幫你完成以前要花好長時間做嘅嘢，你會自然對AI產生興趣。
學少少基本技術技能
如果想再進一步，可以考慮學 電腦編程，呢個係AI開發最常用嘅工具語言。對大部分人嚟講，唔使學得太進階，識得基本操作，例如點樣寫簡單嘅指令，已經可以用嚟處理數據同控制AI。了解電腦編程唔單只係增加可以應用ai嘅範疇就更加係擴闊自己思考模式嘅方法。
加入AI社群同學習資源
學習需要交流，需要互相勉勵鞭策。同其他學AI嘅人交流，分享經驗，呢個過程會令你學得更加快。建議可以加入一啲AI嘅群組，報讀網上課程。學識好快亦會推出 AI 課程，建立學習群組。希望可以為喜愛學識嘅朋友提供一個度身訂做嘅學習環境。
學習使用AI並唔係一件難事，反而係一個充滿可能性嘅過程，絕對值得你投入時間裝備自己。好多時我哋對AI有種恐懼，產生一種抗拒嘅心態，但同樣嘅心態喺過去曾經都出現過喺電腦同互聯網嘅普及上。今時今日已經再冇人會懷疑應唔應該使用電腦及互聯網。鼓勵大家對AI都可以從觀望者變成實踐者，嚟緊1月22晚嘅講座我會再詳細啲同大家解釋。
唔好等，現在就開始學習啦！
想認識多啲關於AI? 立即去睇下 AI 時代的入門知識
其他同類文章
學識會員