恐怖故仔你識幾多？

聽日就係一年一度嘅萬聖節，唔知大家有冇扮鬼扮馬，或者玩下鬼屋，講下鬼故呢？其實恐怖野又唔係淨係得鬼，呢個世界有大把會令人驚的故仔，等學識同大家講下唔同類型嘅「恐怖故仔」，比啲題材大家聽日扮野吹水啦：

超自然恐怖：泛指涉及超自然事物嘅恐怖故仔，而常見於恐怖故仔嘅超自然元素有鬼魂、喪屍同吸血鬼等等。

哥德式恐怖：一種「結合恐怖、死亡同浪漫」嘅體裁，被指為哥德式恐怖嘅例子有 1764 年出嘅哥德小說《奧特蘭托堡》、1818 年嘅《科學怪人》以及 1897 年嘅《德古拉》等等。

肉體恐怖：一種運用人體變異令讀者觀眾驚嘅體裁，故仔內容會講及角色因為受某啲力量影響，而身體出現得人驚嘅變化，例如係身體俾怪獸寄生而變到不似人形、手腳俾人斬斷、或者身體俾神秘力量影響而監生腐爛呀噉，即係話肉體恐怖通常都會有極血腥同露出內臟嘅畫面。

宇宙恐怖：展示人嘅微不足道同埋威脅嘅不可知，呢個文類嘅作品唔興用血腥或者突發驚嚇等傳統恐怖故仔常用嘅橋段，而係會講述一啲浩瀚又神秘嘅力量威脅主角生存。

潑濺鬅客：係源自 1980 年代嘅一股恐怖文學思潮，特徵係主張運用極度露骨嘅暴力同血腥（內臟四濺）嚟令讀者觀眾震驚，其中一個出名例子有《恐懼鬥室系列》。

心理恐怖：集中用角色嘅心理同情緒狀態嚟嚇讀者觀眾。心理恐怖通常會講到一啲精神上唔穩定嘅角色，簡單嘅例子有心理變態嘅殺人狂。被指係出色心理恐怖作品嘅有 1987 年嘅史提芬京長篇小說《戰慄遊戲》同埋 1991 年嘅美國電影《沉默嘅羔羊》。

唔知大家中意邊類嘅恐怖嘢呢？留言話畀我哋知啦。