Christine係一位移居澳洲十五年嘅港人，從事金融工作之餘，亦鍾意透過YouTube睇片學習。幾個月前，佢無意中從演算法認識咗江啟明博士（Dr.江），於是第一次使用廣東話教學平台學識hok6.com ，報讀咗佢嘅【AI時代的入門知識】同後續嘅【計算思維與AI溝通工作坊】。
【入門知識】係Dr.江【AI時代】系列嘅第一個課程，理念係由基本原理開始認識人工智能（AI），而非僅限於學習應用操作。本身冇科技背景嘅Christine將之比喻為「幼稚園」：「喺我個年代，幼稚園嘅重點唔係學做數、寫生字，而係點樣同其他小朋友和平共處，做一個好人。」何謂同AI和平共處？「AI唔係你肚裡面條蟲。佢需要用家擁有通識能力、有立場，知道ethically應該點樣用AI，例如考慮AI吸納資訊時有冇保障資訊製作者嘅權益。如果冇呢個base， AI可以係好可怕嘅工具；或者淪為取代人類思考、單純用黎交功課嘅工具。」
後續【工作坊】則重於唔同情況下嘅AI應用。除咗「落手落腳做practice」練習操作技巧外，Christine認為最大嘅收穫係學習思維嘅改變。「我自己睇到未來嘅學習方法唔再著重於揾個answer，而係要知道自己想問咩，知道個問題同我嘅目標有咩關聯，個AI自然就做到出黎，咁我就可以花多啲時間主動諗我想學習啲咩，而非淨係做資料搜集已經用曬啲時間。」
而家，Christine喺新聞蒐集、支出記錄到制定行程方面，都習慣使用AI。「有啲嘢自動化咗之後，唔使日日重複，只要喺AI入面set咗場景，我一㩒入去就可以睇到以前要每日重複工序先得到嘅結果。」「例如自動新聞摘要：我自己喺未有AI時，都要成日為工作或興趣揾新聞。以前好嘥時間，要用search engine或者靠Facebook feed被動地接觸，後者壞處係會比佢sidetrack左去睇其他嘢。而AI作為一個由我主導嘅密封環境，我就專心好多。」「又例如Excel以前要揼揼揼，而家可以教佢點feed data，用prompt指點佢做processing，好快就出到report，效率高好多。」
講到Dr.江嘅教學風格，Christine嘅第一印象係佢平易近人。「佢比較隨和，冇咁大個ego，唔會覺得自己嘅答案係絕對真理，亦唔介意被challenge。有啲嘢佢會話『我未必知，咁我翻去揾』」「我地問咩佢都會比好多update，唔會敷衍。」喺學識嘅留言板上，經常可以見到學員同導師進行課堂以外嘅延伸對話。例如，有同學帶咗關於AI點樣影響腦神經發展嘅研究討論，亦有同學好奇大學教育點樣應對學生用AI交功課。「喺呢個平台上，學生都係主動求學，唔係被逼，所以學習氣氛好好。」
現居澳洲嘅Christine雖然習慣用英文，但仍然對廣東話情有獨鍾。「例如AI要比指令時，我都係用廣東話。用英文有時捉唔到個神髓。」呢個亦係佢欣賞學識嘅原因之一。「因為地域限制，我自己冇可能喺香港上堂，但喺呢度都可以聽到廣東話授課。」「學識有自己嘅平台放片、可以喺上面嘅留言版做討論、亦都有real-time class interaction，好似上tutorial咁，個效果幾好。」所以，相比普通YouTube學習，Christine認為平台嘅課程更加有組織，學習方式更加主動，同導師嘅關係都比較親密。
學識對人文教育嘅尊重同對年輕學者嘅重視，亦係Christine支持嘅原因。幾個月內，佢接連報讀咗陶國璋教授嘅【儒家思想能配合現代教育嗎？】同Ivan Wong 嘅【壞人的十萬個為什麼：犯罪學入門】。「同一般專教音樂、英語等比較result-oriented嘅平台唔同，學識樣樣都有，尤其係一啲哲學、歷史嘅人文學科，我覺得係好偉大嘅精力投資，喺呢個世代好少有。」畢竟，「外面嘅學府都有唔少類似課程，但呢個平台能令到識教嘅人想教，平台師資特別集中於年輕學者，提供到非一般old seafood嘅思維方式。」
未來，除咗繼續進修AI相關嘅課程外，Christine亦著眼香港文化：「我對廣東話填詞果個Course有興趣。同埋好似有一個係關於香港唔同地方嘅歷史嘅？」身在外地嘅佢，依然心繫香港。
--
Christine 認為AI會改變未來社會嘅學習方式。你又有咩想法呢？📚✨
學識會員