黃子華係棟篤笑《越大鑊越快樂》入面講過一個「係啦」定律：
「係啦」定律係全宇宙最高既定律。「係啦」定律只係一個簡稱，佢既全名係「係咁架啦！」
細路仔唔明白咁深奧既定律，所以遇到唔開心既野會成日問「點解既？點解既？」大人就明啦，大人會點答？「有乜咁多點解啫？係咁架啦！」
呢個笑話表明上諷刺大人對現實妥協。面對一切問題都用「係咁架啦」既態度去敷衍。係人見到都想打鑊。但從另一角度睇，唔係咁樣，可以點樣？
網上有人講過「點解？」係世界上最powerful既問題，對咩我地都可以問「點解？」。
「點解啲野越來越貴？」
「因為有通漲。」
「點解有通漲？」
「因為銀行不斷印錢。」
「點解銀行不斷印錢？」
「因為政府無錢。」
「點解政府無錢？」
…
如果有個細路咁樣不斷問點解，終有一個moment 你都會話：「係咁架啦！」
「係咁架啦！」除左係一種消極既態度，亦都可以表示一切「點解」，最後都會達到一種不言而喻既地步。呢個不言而喻既野，就係事物本身既「咁樣」，係事物被言喻、解釋前既狀態。呢種狀態，道家稱之為「自然」。
「自然」原本唔係指今日我地所理解既大自然，或者nature。「自」的意思是事物自身或本身；「然」字係古文中可以用作「係」既意思，或者指「的確係咁」。所以「自然」既字面意思就係「本身就係咁」。
道家認為，當我地問「點解？」既時候，往往預設左事物係可以解釋既，背後一定有真理。但往往呢種信念先係禍患既根源。道家所見既春秋戰國時代，天下大亂、諸子並起，每個學派都聲稱自己掌握真理，可以結束天下亂局，但除左各為其主、互相攻伐，根本莫衷一是。近代既意識形態之爭同道德塔利班更可見一斑。
道家認為，當甲聲稱A係真理既時候，乙就可以主張A係錯。於是甲就要用理由B證明A係啱。但乙同樣可以反對B。如果揾阿丙裁決，甲同乙又可以唔同意丙。 所以，所有可以被陳述出黎既「真理」，都唔係最終極既真理。但咁唔係表示有一個神秘而不可言傳既真理，而係人認定 真理 時，永遠無辦法擺脫自己觀點既局限。
莊子認為所謂既「真相」、「真理」，都係某人將佢接受為「真」既結果：
道行之而成，物謂之而然。惡乎然？然於然。惡乎不然？不然於不然。物固有所然，物固有所可。無物不然，無物不可。
點解事物係咁？
因為我地將佢理解成咁。
點解事物唔係咁？
因為我地將佢理解成唔係咁。
世上並無一個我地理解同接受之前既所謂現實或者真相。
明白到呢一點，「係咁架啦」就可以有兩種解讀，一種係固執自己既理解，認為自己理解既就係唯一既現實同真相。但另一種解讀係，「本來就係咁」：我地唔再固執自己理解既就係現實，而係等現實呈現自己，擺係大家眼前。呢個就係「自然」，係一切觀點同角度既來源，亦係一切紛爭既歸宿。
但係…等等，如果真相就係一切都只係觀點與角度，咁當我地聲稱「一切都只係觀點與角度」，呢句話又係咪真呢？當我地話「真理不可言傳」，唔係已經用緊語言講緊呢樣野？咁道家咪自我推翻？道家哲學 應該點理解？想了解更多，歡迎報讀「道家哲學之不自然人類研究中心」，我地慢慢傾。
其他同類文章
學識會員