邏輯謬誤 知多啲❗

想像情境：阿珍想買隻貓貓返屋企養，但佢阿媽反對。

阿珍：媽，我想養隻貓貓，佢哋好可愛！

阿媽：你養貓？噉以後你又會想養隻狗做佢朋友，條狗再想養條魚，條魚又想養隻雀。最終我哋屋企變成動物園，連我張梳化都會畀大笨象坐爛！所以絕對唔可以養貓！

喺呢場對話裡便，阿媽講嘅論點合唔合理呢？養貓貓係咪真係必然會極端後果（屋企變成動物園、大笨象出現）呢？

了解邏輯謬誤，成為思考高手！

你有冇試過討論嗰陣覺得對方講嘅嘢「好似啱啱哋」但又總係覺得有啲怪？呢啲可能係邏輯謬誤嘅威力！邏輯謬誤係一啲錯誤嘅推理，望落可能合理，但實際上經唔起考驗，認真諗深一層就會發覺佢根本唔合理。

上面個例子入便阿媽講嘅，係幾典型嘅 #滑坡謬論。滑坡謬論係謬論嘅一種，假設一個細微嘅行動或者提議必定會引發一連串極端後果，但查實佢並冇提供足夠證據去支持呢啲連鎖反應：世上養貓嘅人當中，絕大多數都冇養大笨象，即係話由客觀證據睇，阿媽講嘅嗰串連鎖反應冇乜可能會發生，但係佢就信誓旦旦噉講到好似嗰串連鎖反應係不證自明嘅噉。

總括嚟講，滑坡謬誤嘅關鍵錯誤係冇考慮每一步嘅現實性同可信性，變成咗一個過火嘅假設。識別同避免呢類謬誤，有助提升我哋嘅邏輯思維同溝通能力。

除此之外，謬論仲有分好多種，例如係：

#人身攻擊（拉丁文：Ad Hominem）：唔回應對方嘅論點，反而攻擊發言者本身。

草人謬論：講緊謬論嗰個人將對手提倡嘅立場講成第個易駁啲－但實際上根本唔啦更－嘅立場。

主流思想謬論：純粹因為個主張大路、多人信就覺得佢真確合理。

想學多啲呢方面嘅嘢，可以參考吓粵語維基入面「謬論」嘅條目，亦都可以考慮報讀【哲學基礎課程 : 批判思考與基礎邏輯】！