委內瑞拉今年10月1日就開始過聖誕？

又到聖誕～又到聖誕～咦？乜原來聖誕可以唔係12月嘅咩？

委內瑞拉總統馬杜羅喺9月初宣佈將2024年嘅聖誕節假期提前到10月1日，但呢單看似可愛嘅新聞背後，其實係嘗試緊掩蓋無數嘅質疑聲浪。馬杜羅喺今年7月委內瑞拉大選中宣稱自己當選，但同時拒絕公佈投票細節，被指控操作選舉結果。

反對派發起咗大規模嘅示威，而呢啲抗議活動亦遭到咗武力鎮壓。喺前所未有嘅政治危機面前，馬杜羅宣佈將今年嘅聖誕節假期提前至10月1日，被認為係希望透過歡樂嘅節日氛圍轉移沸騰嘅民怨。

雖然呢件事聽落荒謬，但對委內瑞拉嘅民眾嚟講已經唔係新鮮事。喺2021年同2023年，馬杜羅政權都曾經出於政治、經濟原因，將聖誕節假期分別提前至10月初以及11月初。

對於馬杜羅嘅故技重施，委內瑞拉主教會聯盟譴責「(聖誕節)唔應該用於政治或宣傳目的」，並且發聲明強調「聖誕節係喺12月25日」。

但即使係喺多方立場嘅反對聲浪中、喺呢個9成以上人口都係基督教或天主教教徒嘅國家中，馬杜羅仍然用佢嘅權力將「慶祝聖誕」呢個具重大宗教意義嘅活動，變成為佢嘅政治需求服務嘅工具，同時佢亦已經展開咗佢第三個為期6年嘅總統任期。

或者喺動盪嘅時局中，好多曾經係理所當然嘅事都可能會變得唔再係我哋認識嘅面貌。但我哋亦知道喺偌大嘅洪流中，仍然有唔少人唔想放棄看似渺小嘅個人。我哋相信，一個人嘅思想要不被淹沒，唯有保持汲取知識、保持思考、保持批判。希望喺緊嘅日子仍然能夠陪伴大家一齊學習更多知識，祝各位聖誕快樂！

#聖誕節 #聖誕 #委內瑞拉 #線上課程 #學識 #hok6