我想和你鬥命長 講座內容透露

衰老係咩嚟？

衰老係指身體細胞裏面嘅DNA、蛋白質等物質隨機損傷嘅累積，最後超出身體自我修復嘅能力，逐漸削弱細胞、組織、器官以至系統嘅正常功能，因此令人顯現例如反應變慢、視力聽力衰退、皮膚喪失彈性、骨質流失等嘅老化特徵。

 

微觀衰老

身體正常修復機制日漸衰弱造成身體衰老。用微觀層面去睇，細胞需要能量維持生命，粒線體喺生產能量嘅過程中，會產生副產品活性氧與自由基。呢啲破壞力強嘅「氧化壓力」會損害細胞，包括DNA中嘅遺傳資訊，所造成嘅傷害唔可以全部修復。

 

長生不老藥

當細胞嘅DNA受損會停止凋亡過程，變成卡咗喺生同死之間嘅「殭屍細胞」。隨着年齡增長，受損細胞累積並引起炎症，改變新陳代謝與幹細胞功能，促進衰老同與之相關嘅疾病，例如阿兹海默病。當細胞去到某程度嘅損傷時，會經歷自己嘅衰老過程，並開始釋放炎症因子，刺激免疫反應將受損細胞清除。年輕人健康嘅免疫系統能夠清除受損細胞，但當年紀大咗，清除效率低咗，受損細胞累積導致潛在健康問題。如果能夠殲滅不死嘅殭屍細胞，就有望抗衰老。有研究已經發現清除受損細胞嘅方法，甚至有公司開發清除呢啲細胞嘅「長生不老藥」，令人類有望過更健康、更長壽嘅生活。