「有尐迤」？「濕笛笛」？──粵語本字嘅謎團

近年網上越嚟越多人嘗試「考本字」，認為本字係反映粵語古雅嘅力證。可惜，呢啲「本字」好多都係冇乜根據，穿鑿附會居多。要考出正確嘅本字，除咗要意義上貼合之外，都應該從聲韻嘅角度做考究。一旦得出嚟嘅結果唔符合語音演變嘅規律，可信性就好低。

一個好常見嘅例子，好多網上嘅文章話「迤」係「hea」嘅本字，呢個講法於理不合。迤，粵音「以」，同「hea」呢個音拉唔上任何關係，從聲韻角度而言已經唔合邏輯。再加上「迤」嘅意義都同「hea」有好大差別，一般係解作「曲折」或者「緩慢」。另一個例子係有論調認為「啲」嘅本字係「尐」，但「尐」呢個生僻字嘅讀音應該係「折」（zit3），喺語音上同「啲」差得太遠。雖然「迤」同「尐」呢啲講法唔成立，但又真係有唔少人信以為真，睇啲關於本字嘅文章真係要小心先得。

但係，有啲口語又真係可以考到個合理嘅本字出嚟。正如所謂「濕笛笛」個「笛」，本字其實係「滴」。「滴」字即係點狀嘅水，意義上本身就已經同「濕」有密切關係。喺語音角度而言，「滴」（dik6）字經過變調之後就會讀做「笛」（dek6）呢個音，而呢種長短元音嘅變調喺粵語非常常見。呢種喺語音同意義上都吻合嘅本字先可以令人信服。

考究本字固然可以令我哋對母語認識更深。但既然我哋愛母語，就唔能夠盲目相信某啲似是而非、實則上冇乜邏輯嘅講法，先係真正尊重母語嘅表現。喺「粵語語言學入門 2.0」，我會同大家嘗試去考究幾個本字，等大家對考本字呢種工作有基礎嘅理解，分辨出坊間嘅講法係啱定錯。課堂見！