第二語言習得

第二語言習得（英文：second language acquisition，SLA）係指一個人學第二語言嘅過程。正常嚟講，一個人喺生命早期會一路聽住屋企人講嘢，聽吓聽吓就會由屋企人度學識講自己嘅母語（L1）；如果佢打後喺（例如）學校度學啲 L1 以外嘅語言（L2, L3...），噉佢學 L2 同 L3 等嘅語言嘅過程就算係 SLA 。

舉具體啲嘅例子說明：
想像而家有個細路，叫佢做明仔：明仔阿爺阿嫲嗰輩就由廣東移民過咗美國，佢喺美國出世同大，同屋企人講開廣東話，同阿爺阿嫲飲茶嗰時完全 100% 係用廣東話講嘢嘅；而等到明仔夠大個嗰陣，佢就返學，喺學校嗰度學英文，用英文同老師同學溝通，不過同屋企人就繼續用廣東話；喺呢個情況下，明仔嘅 L1 係廣東話而 L2 係英文，佢學英文嘅過程係一段 SLA ；

原則上，一個人學親母語以外嘅語言都算係 SLA —就算非母語語言嘅數量多過一隻（L2, L3...）都係噉話，例如東南亞嗰啲粵藉華人就成日係以廣東話做母語，跟住喺學校會學英文、標準官話同埋身處國家嘅官方語言（即係例如人喺馬來西亞嘅就會學馬拉話）噉嘅，對一個噉嘅人嚟講，廣東話係佢嘅 L1，而英文、標準官話同身處國家嘅語言就算係佢嘅 L2 。