邊種基本語序最為罕見？

「香港學識逹人挑戰」入面有一條噉樣嘅問題：
邊一種基本語序最為罕見？（註：廣東話一般被認為是 主語 動詞 賓語 SVO 語言）。
A. 主語 賓語 動詞 SOV
B. 賓語 主語 動詞 OSV
C. 動詞 主語 賓語 VSO
D. 動詞 賓語 主語 VOS

「基本語序」
如果你識講廣東話又識講英文，應該會好理所當然咁覺得一句普通句子（例如「我睇過一本書。」／“I read a book”），首先要講個「主語」（我），然後有個「動詞」（睇／睇過），跟住有個「賓語」（一本書）。呢一個順序係廣東話同英文嘅基本語序，即係 主語 動詞 賓語 Subject-Verb-Object (SVO) 。

如果你學過日文、韓文或其土耳其文，就會發現呢啲語言嘅動詞同賓語掉轉咗，變成 主語 賓語 動詞 Subject-Object-Verb (SOV) 。即係「我睇咗一本書」變成「?我一本書睇咗」噉樣，廣東語怪怪地，勉強知你講乜，英文甚至唔講得添（??I a book read.)。

可能你會問，有冇啲語言有其他嘅「基本語序」？係有嘅，基本上每一個理論上可能嘅組合都係存在嘅，即係有啲語言係用 VSO/ VOS/ OVS/ OSV 呢一啲語序嘅。照理有六款語序，應該款款均勻先係，好似應該每款都佔10幾個％先啱數。不過大部分嘅人類語言，都屬於 SVO或者SOV呢兩種基本語序嘅其中一種。

根據 WALS Online (2013) 嘅講法，呢六款基本語序嘅「稀有度」大約係噉（基於1187種語言）：

SOV (47.5%) >
SVO (41.1%) >>>>>
VSO (8.0%) >
VOS (2.1%) >
OVS (0.9%) >
OSV (0.3%)

換言之，主語行先嘅語言佔咗差唔多九成，淨返一成係動詞行先。賓話行先嘅語言，只係心意心意吓。謹慎嘅你可能會問，呢1187種語言有冇廣泛代表性先？會唔會係小圈子黎架咋？會唔會有啲語系（例如印歐語系）佔咗大多數先，所以先呈現呢個「稀有度」？又會唔會有啲弱勢嘅聲音冇納入呢個研究入面？喺現存嘅6000種人類語言入面，1000幾種都佔6分之1，都唔算係少數，而且呢啲語言嘅分佈都相當廣泛（WALS online上面有做得好靚嘅地圖可以睇）。

鍥而不捨嘅你可以繼續問，咁點解揀呢1187種呢？其他幾千種呢？係咪篩選過架？其實並唔係每種語言都有好好嘅紀錄，好多時我地知道有一個語言存在，唔代表我地就有足夠嘅資訊去討論呢個語言（所以點解語言嘅保存同紀錄咁重要）。

好喇，噉所以條問題嘅答案就係B，出得係有啲陰濕，因為VSO/VOS語言本身都係少數。不過聰明嘅你可能會諗，唔係喎，OSV有幾罕見先？廣東話都可以講「呢本書我睇咗」啦，咪就係OSV囉。呢度個問題唔係「一個語言可唔可以允許OSV語序」，而係呢個語序係唔係夠「基本」。

噉咩係「基本」呢？一般係指一句直述句，有一個動詞，兩個名詞，表達緊一個完整嘅概念，並且無話題、焦點等嘅含意。「呢本書我睇咗」入面嘅「呢本書」，一般被認為係一句句子嘅話題，所以並唔係最「基本」嘅語序。吓，噉就係「基本」架喇？點解唔可以「有話題先係基本」……

學識問，可能就學識！加油！

－－－－－
參考文獻：
Matthew S. Dryer. 2013. Order of Subject, Object and Verb. In: Dryer, Matthew S. & Haspelmath, Martin (eds.)
The World Atlas of Language Structures Online. Leipzig: Max Planck Institute for Evolutionary Anthropology. (Available online at http://wals.info/chapter/81, Accessed on 2022-04-19.)