500年一遇？你講就係呀？

「500年一遇」「100年一遇」呢啲講法，其實係統計學概念。意思即係話根據過去可能係幾十年數據嘅分布，計算出今次數值距離過去數據平均值有幾遠幾稀有而得出嘅結論，並唔係真係話過去五百年只係出現過一次，因為根本冇嗰啲數據。理論上如果數值夠大，係可以用幾十年嘅數據去得出「億年一遇」嘅結論。

呢種結論方式係假設左時間同數值係冇相關性，或者冇趨勢上嘅改變。所以其實如果500年一遇開始經常發生，正正係應該理解為「環境真係改變咗」，「未來嘅數值分布同過去幾十年嘅數值分布相信已經唔一樣」呢種結論先啱，而唔係調返轉作為藉口「500年一遇喎，咁罕見我哋點預防呀」。為咗應對未來環境嘅轉變，更加應該做嘢先啱。

正確理解同使用呢種講法其實冇問題，不過若然講出嚟嘅人同埋聽到嘅市民其實都唔明呢啲講法背後嘅意思，咁就有問題了。

#500年一遇 #黑雨 #水浸 #極端情況 #統計學 #香港 #學識 #博雅教育