OpenAI 出咗新瀏覽器 Atlas

OpenAI 出咗新瀏覽器 Atlas，我會形容係「以 AI 為預設」嘅瀏覽器，正式向 Google Chrome 挑戰。根據 OpenAI 自己嘅講法，今次係全面 redesign 瀏覽器（甚至唔應該再叫佢做瀏覽器），比起 Perplexity Comet 係更進一步。我會形容係一個「同 AI 一齊使用互聯網嘅工具」。比起以往，要 AI 幫你喺網上搜尋，往往需要好多 copy and paste 嘅工序，而家佢係直接明白你睇緊嘅嘢，直接幫你解釋甚至執行Agent 嘅工作。暫時淨係 macOS 先有得用，其它平台應該好快陸續推出。

同 Chrome 比，Atlas 的確將 AI 擺到核心位置，少咗「跳去另一個 chatbot 分頁」嘅麻煩，不過生態、相容性、企業部署流程等，短期內未必追得上 Chrome。出咗街只係一日，已經有好多人投訴 Atlas 有好多嘢我哋 take it for granted 瀏覽器應該做到嘅都做唔到 （有 website load 唔到、冇得用咁多 extensions)。要穩定、熟悉同擴充，Chrome 仍然係日常使用嘅首選；但如果你願意試吓比 AI 改變你嘅日常工作流程，Atlas 就有意思。其實 Chrome 近期亦加深咗 Gemini AI 融合，不過 Chrome 裏面嘅 AI 依然係冇記憶力，所以暫時只係好表面嘅融合。

至於 Perplexity 嘅 Comet，宗旨都係「AI 化瀏覽」。不過今次 OpenAI 可能做得更加徹底，但亦引起更加多兼容性嘅問題。用家如果想試用AI瀏覽，但又有好多慣用嘅 chrome extensions 唔想放棄住，可能試用 Perplexity Comet 會係中間方案。

我會喺嚟緊10月28日學識AI學識月會再分享多啲呢方面嘅用後感。到時再同大家傾。