你點樣學識用「乜野」？👶

每個識講粵語嘅人，都識用疑問詞黎問問題。例如：

（1）你叫乜野名呀？

（2）呢度邊度黎架？

（3）你點解又遲到呀？

但其實，每個識講粵語嘅人，都識喺問問題以外嘅時候用疑問詞。睇吓下面呢段對話：

媽：「你問咗乜野？」

仔：「我冇問乜野。」

媽：「你乜野都冇問？」

仔：「我想講我冇問啲乜野啫。」

媽：「乜野冇問啲乜野呀？」

仔：「我係噉意問咗乜野乜野囉。」

媽：「你實係問咗啲唔知乜野啦。」

仔：「咁你知仲問乜野呀問？」

媽：「我咪問乜野係乜野囉！」

入面有好多個「乜野」，但唔係每個「乜野」都係作為疑問詞。更神奇嘅係，好多句入面，「乜野」都有唔同嘅意思。事實上，「乜野」嘅實際意思好大程度上取決於同佢共現嘅要素。粗略而言：

－乜野：what

－冇+乜野：nothing

－乜野+都：everything

－啲乜野：something

－乜野+乜野：something I don’t bother to mention

－唔知+乜野：something I don’t know

同英文好唔一樣，粵語嘅「乜野」可以話係能者多勞，真係神又係佢，鬼又係佢。唔單止係咁，有時疑問詞仲可以拎黎當否定詞噉用，睇吓：

（4）阿明邊度識講日文呀？（＝阿明唔識講日文）

（5）乜野阿明識講日文呀？（＝阿明唔識講日文）

（6）你sor乜野ry呀？我又唔係鬧你。（＝你唔應該say sorry）

究竟「乜野」係乜野，未必有一個簡單答案，但我地至少可以由知道「乜野」可以係乜野開始。雖然英文同粵語喺呢方面好唔同，但粵語絕對唔係唯一一種語言有咁豐富嘅用法。博大精深嘅，未必係粵語，而好可能係自然語言入面嘅疑問詞。如果你有學過其他語言，有冇留意到佢地嘅疑問詞都有好神奇嘅用法？