🦾原來網絡可以用嚟教 AI 理解字詞嘅意思？

你有冇試過見到一隻字詞，就即刻諗起另一隻相關字詞？例如見到太陽，可能即刻聯想到光、熱或者夏天。呢種現象就係 #語義網絡（Semantic Network）嘅重點！

語義網絡係乜？

語義網絡係一種 #抽象化 嘅模型，解釋人點樣喺腦入便儲起同連結唔同詞語嘅意思。人腦嘅呢種功能可以想像成一個網絡，網絡嘅每一點係一隻字詞，而字詞之間會有連繫，描述佢哋之間嘅關係。

舉幾個例子：

「貓 」可能會連結到 (屬於) 動物 、 (屬於) 寵物 、(會) 喵喵叫

「學校 」可能會連結到 (有) 老師 、 (屬於) 地方、 (有) 考試

「打機 」可能會連結到 (屬於) 活動 、 (用到) 手眼協調 、 (用到) 遊戲機

根據語義網絡嘅模型，當人聽到或者讀到一隻字詞，相關嘅詞語可能會一齊「啟動」令到佢哋更易諗起呢啲字詞！

語義網絡有咩用？

人工智能：#AI 同搜尋器都利用類似概念去理解人類輸入嘅內容。舉個簡化嘅例子：想像依家用家打咗「衰退」兩隻字入搜尋器嗰度，佢可能係想搵經濟相關內容（經濟衰退）又可能係想搵醫療相關內容（記憶力衰退），搜尋器兩種內容都同佢搵咗返嚟。之後呢位用家就進一步打「衰退 經濟」入去搜尋器，搜尋器就可以計吓數，睇睇佢搵返嚟嘅網頁：

香港二零二六年經濟展望

美國今年啲經濟指標係點

廣東今年 GDP 又創新高

李 XX 醫生同你講解腦退化

研究：新藥有效令到個腦更年輕

佢睇返語義網絡，發現嗰啲關鍵詞（經濟展望、GDP…）同「經濟」關係好接近，但係嗰啲關鍵詞（腦退化、新藥...）就同「經濟」差好遠。最後就決定淨係顯示畀用家揀——就係噉，搜尋器用咗語義網絡嚟達致更「聰明」嘅行為。

你有冇試過聽到一個詞，然後腦入面彈出一大串相關詞語？