據由

據由（英文：evidentiality）係語言學上嘅一個概念，講緊一隻語言點樣表達以下嘅資訊：

「句子表達緊嘅資訊，來源喺邊？」係講嘢嘅人親眼睇到吖，係聽返嚟吖，定係由第啲來源嚟嘅？首先，想像以下嘅廣東話句子：

A 君：「阿祥喺度踢波。」

呢句句子唔包含據由資訊－A 君可能係親眼睇到阿祥喺度踢波，又有可能佢係由 B 君嗰度聽到呢件資訊，而佢好信 B 君。如果 A 君想嘜清楚「件資訊係聽返嚟嘅」呢點，佢可以：

「我聽人講，話阿祥喺度踢波。」

世上有唔少語言仲有更加仔細噉處理講嘢嗰時嘅據由，例如廿一世紀初嘅土耳其話就出嗮名會對啲動詞做詞形變化嚟表達據由資訊，呢啲語言近乎係「講親嘢都會表達據由資訊」咁滯。呢啲語言就算係具有言據性－噉亦即係話，世上嘅語言最少有得按據由嘜法嚟分做

1. 有據由詞形變化
2. 冇據由詞形變化

兩大類。事實係，據由呢個概念由廿世紀後半橛起就一路受到重視，尤其喺語言類型學上有好多研究者討論。

廿一世紀初嘅眾漢語（包括廣東話）同埋英文偏向係分析語。噉講意思即係話佢哋比較少詞形變化，主要係靠住語序同幫手字詞（helper word；包括助詞同介詞等）嚟表達句子啲字詞之間嘅關係。要嘜一句嘢嘅據由嗰陣，分析語通常會做嘅嘢係「加多幾隻字落去句子度」。以下用廣東話同英文做例子－

廣東話例句：

「佢返咗香港。」
呢句嘢可以變做 →

「我睇到佢返咗香港。」
「我聽講佢返咗香港。」
或者「佢返咗香港喎。」

世上有唔少（有估計話係大約 25%）語言仲會進一步，靠詞形變化嚟嘜據由－即係話呢啲語言要表達「啲資訊由邊度嚟」嗰陣，唔淨只係加多幾隻字落句子度咁簡單，而係會將啲字變樣。

想了解更多有關語言類型學嘅資訊，不妨追蹤學識，或者睇吓原文
https://zh.wikipedia.org/wiki/语言类型学

*文章由粵語維基作者親自授權學識使用

學識會繼續為大家帶嚟更多有關粵語文化嘅資訊，希望大家可以多多支持

#學識 #粵語 #中文 #語言學 #據由