古代士兵都會「射波」？

古代士兵都會「射波」？

工傷有肉食，扮病株三族？

喺香港，打工仔 如果 唔想返工，扮自己病咗嚟請假，我哋會叫呢啲行為做「射波」。咁你有冇諗過，古代都有類似嘅情況發生？人之常情實有嘅，重要係打緊仗喎。《墨子》入面有幾條守城嘅規定，就同 守城 嘅時候傷病情況有關嘅。

《墨子》話，如果士兵喺守城期間受咗重傷，就要俾佢哋返屋企休養，妥善照顧佢哋，提供醫生同埋送藥品，重每日賞佢哋兩升酒同兩斤肉。酒同肉喎，古代平時啲平民都未必食到，竟然每日都要有。係咪聽起嚟好似VIP服務？未完！重會成日派官員去探望慰問，睇下佢哋病情有冇好轉。如果病情好轉，咪即刻上報，歸隊繼續效力囉。

點解要咁厚待傷病嘅人呢？其實好簡單，如果士兵知道自己受傷咗會得到咁好嘅照顧，佢哋喺打仗嘅時候就唔會有後顧之憂，會更加賣力搏命守城。同時，呢個做法重可以 穩定軍心，令作戰士兵唔使擔心自己受傷嘅屋企人同朋友，知道一旦有事，墨者治下嘅總部會好好照顧佢哋。

另外，等需要休息嘅人得到適當嘅休息，亦可以確保佢哋身體恢復得更快，咁做嘢嘅人先會專心做到嘢，提高整體嘅效率同戰鬥力。

但係，如果有人故意自殘，扮病 嚟呃官府，想逃避打仗，後果就大鑊啦！要株連三族，咁重敢射波咩？點解要重罰呢啲人呢？從 管理學 嘅角度嚟諗，呢個係為咗維持制度嘅 公平性 同 權威性。如果唔重罰呢啲扮病嘅人，其他人見到會覺得「射波」唔會有咩嚴重後果，甚至有可能效仿，咁整個 制度 就會崩潰，真真正正需要幫助嘅人就會得唔到應有嘅照顧，軍心亦會因此動搖。

當然，古今中外，「避工」同「避戰」都唔容易，而點樣管理好一個團隊，確保每個人都能夠專心做嘢，係需要有一套完善嘅制度同埋公平嚴明嘅 處罰機制。但係要唔要「射波」都睇開公司對你好唔好嘅，總有人死都唔想返工，而現代社會又真係唔洗死。射波咪射波，但係去到兵臨城下，重想射波就變咗 Freeride 晒成個城市嘅人，咁就要諗清楚喇！