近日，因為台灣加權指數數值上超越咗香港恒生指數，好多人見到呢件事都紛紛感嘆台灣超越咗香港。呢件事的確有一定嘅象徵意義，陣間再講。但見到有人錯誤以為呢件事反映台灣股市市值超越咗香港股市市值；又有人話要計算埋匯率先至有得對比。其實簡單來講，指數本身係完全同市值或匯率無關。股市指數只係一個相對嘅概念，通常以某個時間點作為參考，隨意比一個數值佢，例如100，然後之後不斷更新數值反映股市嘅上落。所以股票指數只能夠同自己比，唔能夠直接同其他指數對比。
以恒生指數為例。1964年7月31日創立，當日就係100點。呢個數值同當時香港股市嘅市值係完全無關嘅。而且要留意，恒生指數只係計算一籃子較為大份量嘅上市公司價值嘅上落（亦即藍籌股）。所以藍籌股以外嘅其他公司股價就算跌到零都完全唔會直接影響指數嘅計算。而且恒生指數嘅成份股過去咁多年經過好幾次嘅變換，已經好難直接話呢個指數可以點樣換算邊間公司嘅市值，更何況係整個香港股市所有公司嘅總市值？其他地方嘅指數計算方法亦大同小異。所以直接將兩個地方嘅指數對比可以話完全冇意義。
咁頭先話有意義嘅係咩呢？有意義嘅都係要同自己對比。例如最簡單可以將兩個地方嘅指數一年前嘅數值同今日嘅數值各自作出對比。咁就可以計算到台灣股市市值大概上升咗幾多%，香港又下跌咗幾多%。而指數嘅好處就係方便大家只係需要記得一個數就可以大概知道一個地方股票市場總值嘅變化。當台灣加權指數超越香港恒生指數時，最有意義嘅就係勾起大家記得幾年前香港恒生指數明明係台灣加權指數嘅兩三倍有多，但而家就被超越。咁我哋就可以知道香港股市過去幾年的確比起台灣股市表現差好多。
至於股市市值，筆者剛剛 check 過 WFE (world federation of exchanges) 最新數據 (2023年10月)，香港 (3.9T USD) 依然比台灣大 (1.6T USD)。反而係深圳呢一兩年已經超越咗香港 (4.7T USD)。
參考資料：
https://focus.world-exchanges.org/.../market-statistics
學識會員