舊時中文 × 我的社區小故事：一齊食飯好唔好？

［情景一］

如果你想問人：「一齊食飯好唔好？」我哋可以用文言句式問：「與共食善否？」

其中，「與共」就係「一齊」嘅意思，例如「生死與共」、「禍福與共」，而「善」係「好」嘅意思，「否」就係「不」咁解。

當有人問你：「與共食善否？」你可以用文言文答應：「善。」又或者用文言文拒絕：「否。」

只要將「與共食善否」裡面嘅動詞「食」改做其他動詞，就可以仿作呢句句子，邀請其他人一齊做一件事！

［情景二］

如果你同朋友食完飯，佢一行出街就即刻買杯珍珠奶茶，行多幾步又去買雞蛋仔，你忍唔住想問佢：「未食飽咩？」你可以用文言句式問：「未飽食乎？」喺呢度，「乎」表示反問，類似「嗎」嘅意思。

當有人咁問，你可以答：「飽矣。」「矣」喺呢度解「了」，即係「飽喇」；你都可以答：「未也。」「也」喺呢度解「啊」，即係「未啊」嘅意思。

當然你都可以答：「未也，恒無飽食之時矣。」即係「未啊，永遠都唔會食飽㗎」。

只要將「未飽食乎」裡面嘅動詞「食」改為其他動詞，再將表示程度或狀態嘅「飽」改為其他形容字眼，你就可以仿作呢句句子！

呢啲簡短對答，亦可以應用喺你嘅課堂作品裡面，增加生活氣息。