DSE放榜應該報讀咩科？AI 會唔會搶飯碗？

每年 DSE放榜 焦點都落喺 狀元 大部分報讀醫科嗰度。呢個傳統專業當然吸引：穩定、社會地位高、長期需求。但五年之後嘅世界報讀 醫科 係咪真係咁好？而且成績唔係最頂尖嘅學生，又應該揀咩科好?

醫科、法律、會計呢啲「鐵飯碗」專業過去一直都好受歡迎。不過AI 正改寫職場版圖，連 律師、會計師 都面臨自動化威脅。例如合約審查、稅務申報等程序性工作，AI做得又快又準。醫科方面，雖然醫生仲需要人手，但 AI診斷、遠程醫療 已經開始普及，基層醫護工作未來有機會被技術取代或重組。

你成績係最頂尖嘅話絕對唔一定要放棄傳統專業。醫科、法律依然有佢嘅價值。不過，如果你 DSE 成績未必係最頂尖嗰批，我通常會建議學生考慮以下幾個方向：

第一，數據科學、人工智能 —AI唔單止係威脅，亦都係機遇。學懂開發、管理、運用AI，本身已經係高需求專業。特別係數據分析、機器學習、自然語言處理等範疇，人才一直都唔夠。AI而家雖然識得 coding，但由有 AI 素養嘅工程師去指揮先至能夠充分發揮。你 DSE 如果數理唔錯，真心值得考慮。

第二，健康科技、生物醫學工程 —隨著人口老化，健康科技必然越嚟越重要。結合醫療同科技，做遠程診斷、醫療裝置設計等等嘅工作通常唔需要考牌，但需求穩定，有增長空間。

第三，心理學、輔導學—AI暫時都未取代到真人嘅關懷。隨著現代社會心理健康越嚟越受重視，呢啲領域未來唔怕冇工開。不過要留意，呢啲專業通常要進修深造先有競爭力。

第四，創意產業、內容製作—雖然AI可以幫手畫畫、寫稿，但最終創意方向、人類故事性都要靠人決定。市場仍然需要懂得 內容策略、品牌管理、數碼營銷嘅人。如果你喜歡 人文學科，學識使用AI工具會好適合向呢方面發展。

第五，綠色金融 ESG—環境惡化，資源短缺呢啲長遠必然會更受關注。無論係政府定大財團亦會撥款資助呢啲方面嘅工作，如果你商科底又關心 氣候議題，呢條路線好啱。

最後，亦唔使太擔心你依家揀錯科，因為大學所揀嘅科未必決定你十年後所做嘅工作。AI 時代，技能更新快，企業愈嚟愈願意用技能證明、實習、作品集去補足學歷。「適應力」亦越嚟越被視為最重要嘅軟技能。你第一個學位只係 Launch Pad，之後可以靠 副修、網上課程、實習、研究項目 再升級。只要肯學肯試，條路一定行得到出嚟。

同學，加油！