幽默研究所之有乜咁好笑

「蠱惑的鎗」點解咁好笑？咪就係估佢唔到囉！當你以為支鎗淨係向後射，佢又偏偏向返前面喎。幽默研究裏面，呢個可以用「不協調理論」嚟解釋，即係個故事發展出乎意料，好多時都會有喜劇效果。明白咗呢個理論，就可以解釋到好多唔同形式嘅幽默點樣令人發笑，從多一個角度了解幽默。不過，如果你覺得香港嘅笑話淨係得周星馳同黃子華，而其他就冇乜特別嘅話，噉就要update下你嘅諗法喇。冇錯，啱啱講嘅兩位都係經典， 呢個課程梗係唔會漏咗佢哋。鍾意佢哋嘅朋友除咗自己睇片睇戲之外，喺呢個課程重可以從幽默理論嘅角度，宏觀噉睇到點解香港會出到無厘頭、魚蛋論，而其他地方嘅人未必諗得出。如果你自認係忠實擁躉嘅話，就更加值得諗下除咗重溫經典之外，香港嘅喜劇點解咁出色，重可以令到其他地方嘅人都對香港更加有興趣呢。

其實，喺唔同嘅年代，我哋都見到香港有極具特色、而且極有代表性嘅香港式喜劇。喺呢個課程，我哋就會講下可以點樣透過笑話嚟了解香港，更加知道香港呢個地方細細嘅城市喺亞洲、以至全世界嘅地位。近年成日都講嘅全球化、香港人成日都嗌住要去旅行，呢啲題目係七十年代嘅喜劇都已經攞嚟講笑。同而家對比，大家就會見到香港人行得幾前、幾咁潮。

除咗舊時之外，我哋重會睇下而家嘅港式幽默。香港嘅棟篤笑係唔係淨係得黃子華？梗係唔係啦。鍾意睇棟篤笑嘅朋友都會知道，其實香港近年都好多棟篤笑表演，除咗唔使等、可以成日都有機會睇現場之外，最重要係聽到多啲唔同嘅風格，重有最新最貼地嘅題材。潮文、改歌詞大家都睇唔少，但係除咗睇到笑下之外，大家又有冇諗過二次創作重有乜嘢社會功能？喺咩情況先至最多仿作、諷刺文？

睇完咁多香港同其他地方嘅笑話之後，我哋重會深入啲，諗下「笑」係啲咩嘢。點解好似淨係人先識得講笑話、聽笑話，其他動物可能會識得笑，但係佢哋又識唔識搞笑？而家成日講人工智能，噉 AI 會唔會有一日叻到識得分咩係笑話，咩係爛gag？ 又會唔會有一日，我哋連笑話都唔使諗，由 AI 講笑俾我哋聽？