張保仔原是一名多情美男？！

張保仔係十九世紀一個縱橫珠江三角洲嘅海盜，相信大家都知。不過大家又知唔知史書用咗邊四個字嚟形容佢呢？

答案係「年少色美」，用白話講，即係又後生又有型，靚仔是也。唔係我作㗎，清朝《靖海氛記》就係咁寫。事實上，張保仔成為海盜嘅時候，都不過係正值青春期嘅十五歲，又係漁民子弟，所以仲係一個黑黑實實運動型嘅男仔。

至於張保仔係點成為海盜㗎呢？話說喺佢十五歲果年，遭遇海盜鄭一嘅攻擊，鄭一殺曬張保仔全家之後，見佢幾醒目，就收留做養子。於是鄭一就成為張保仔嘅養父，而佢老婆石陽就係養母。

但呢到只係解釋咗張保仔係「美男」，仲未講「多情」嘅部分。話說鄭一收養咗張保仔後，由於佢真係好靚仔，兼之又「聰慧，有口辯」，既聰明又識講嘢，於是就日久生情，然後就……（幾難以置信都好，真係唔係我作的，史書記載「鄭一嬖之」）。其實同性戀係古已有之，唔係現代先有㗎，喺海洋世界係更加普遍，不過如果係養父子之間又真係比較少有嘅……

不過，你話咁石陽唔呷醋咩？老公同個仔一齊咗喎！我哋都好難知道石陽當時諗緊乜，不過即使石陽地位咁高，都無喺海盜幫派入面留難張保仔，佢反而深得石陽同鄭一信任，喺海盜艦隊入面一直扶搖直上，成為其中一個首領人物。

更重要嘅係，鄭一死咗之後，石陽剛剛繼承海盜嘅指揮大權，就二話不說，改嫁咗俾張保仔，仲同佢平分權力。後來張保仔同石陽仲生咗個仔，叫張玉麟。

咁張玉麟應該叫張保仔做老竇，定係阿哥呢？

參考資料：袁永綸，《靖海氛記》，1830年。