🔤語言學習建構的世界觀

語言學習係兒童成長嘅重要一環，對每個人往後嘅世界觀有深遠嘅影響。

好多成年人喺離開咗正規教育階段，投入工作崗位之後，對呢個世界已經建構咗牢固嘅睇法，不自知自己仲有好多事物未必理解。唔理解從而認為「冇用」，而且會對有唔同世界觀嘅人不理解甚至產生敵意。既然呢一切同我哋喺兒童階段所建立嘅世界觀極之有關，歸根究底，我哋係好值得反思我哋自己喺兒童成長階段係點樣理解呢個世界。

語言學家 Noam Chomsky 提出嘅「語言習得裝置」（Language Acquisition Device, LAD）理論認為，小朋友天生就有學習語言嘅內在機制。喺兒童成長過程中，呢個機制會幫助佢哋自然地快速吸收語言。小朋友喺與他人互動時，會自動理解語言嘅結構同規律，並逐步建立起對世界嘅基本認知。從小學習語言，其實係一個小朋友同世界互動嘅過程；學習一種語言，亦即學習以一種特定嘅視角睇世界。

語言幫助兒童喺社會環境中理解自我，構建世界觀。通過與家庭、學校及社區互動，兒童逐漸掌握語言同文化，從而形成自己對世界嘅理解框架。例如，一個講中文同講廣東話嘅小朋友會接觸到「孝順」、「家人」、「社會和諧」等觀念，呢啲文化概念會影響佢點樣理解同處理自己同他人嘅關係。腦神經科學家 Lera Boroditsky 嘅研究甚至指出，不同語言能夠塑造人點樣理解時間、空間、及因果關係。佢喺實驗中發現，唔同語言背景嘅人喺思考空間方向、顏色分類等方面都會有唔同嘅處理方式，呢種差異可能係由語言塑造出嚟。

除此之外，近年應用喺人工智能嘅大型語言模型 (LLM) 亦正係一個好好嘅例子，顯示出語言點樣建構知識世界。不過呢個要講嘅話有排講，以後有機會再講。

筆者並非語言學出身，但過去十多年喺中大教通識，與學生一同閱讀西方經典及中國古代經典。其中喺睇著名漢學家李約瑟 (Joseph Needham) 嘅著作裏面都有提到，中國古代語言文化所反映出對時間同空間嘅觀念同西方好唔同，而呢一點甚至影響整個文化往後嘅科學發展。所以由此可見，語言除咗係工具，亦係一個思維嘅框架，無形中影響住一個人嘅價值觀同對世界嘅理解。

11月21日晚嘅「孩子學會閱讀的多角度思考」講座，特別針對廣東話及中文閱讀作為學習嘅語言，探討我哋可以點樣幫助兒童閱讀中文 及學習廣東話。另一方面，我哋亦可以透過理解兒童語言學習嘅過程，反思自己過去嘅學習經歷，重新認識自己，認清語言係點樣塑造我哋對世界嘅理解，有助開拓多元視角，從而更靈活地應對多變嘅現代社會。希望大家踴躍參加，一齊探索語言同思維嘅緊密聯繫。

立即去睇下 孩子學會閱讀的多角度思考