南美洲殖民史的國中國

喺17、18世紀嘅南美洲，兩大殖民帝國西班牙同葡萄牙經過兩三個世紀嘅爭地盤之後，基本上已經劃定咗南美洲嘅勢力範圍。喺原始亞馬遜森林裏面當然重有好多地方未完全佔據，殖民者卻周不時會闖入呢啲原始部落裏面捉人返去殖民據點度做奴隸。喺呢個時候，就出現咗一啲由耶穌會傳教士所成立嘅集合化傳教村(Jesuit Reduction)。原來當時除咗有一批批嘅殖民者嚟到南美洲之外，亦有不少傳教士嚟到南美洲，主要目的係想向原住民傳教，並且「教化」佢哋採用歐洲嘅價值觀同生活方式。

儘管用今日嘅角度去睇，大家可能會話佢哋咁樣做係帶有文化偏見，係歐洲中心主義，但傳教村的確令原居民慢慢過上文明生活，更令瓜拉尼人(Guarani) 統合咗各部落嘅方言。對比當時殖民者大量直接捉土著做奴隸嘅方式，傳教士嘅做法已經優勝得多。哲學家如孟德斯鳩同盧梭亦曾經正面評價傳教村，認為係一個理想嘅「高貴野蠻人」社群。

結果呢啲傳教村吸引左大量原住民湧入去生活。開始嘅時候（17世紀初），呢一啲傳教村反而引嚟殖民者更加方便咁去捉啲教化咗嘅「高質」土著做奴隸，違反咗傳教士嘅原意。抗議當然無效，傳教士開始帶領原住民進行勇武抗爭。於是乎呢啲傳教村就開始武裝化，喺今日巴西、阿根廷、巴拉圭三國交界，亦即係兩大殖民帝國邊界嘅「三不管」土地，建立起一個個武裝化嘅傳教村。高峯時呢啲傳教村有十幾萬人口，兵力四千，有火藥、騎兵，成為咗「國中國」。

葡萄牙殖民者曾經派出過千嘅兵力想殲滅呢啲傳教村，結果竟然畀村兵打敗。直到1750年，西班牙、葡萄牙傾掂數，簽訂條約(Treaty of Madrid) 瓜分地盤，再喺1756年聯合出兵，經Guarani War 一役鏟平其中最強大嘅國中國。雖然最後以失敗告終，但帶領呢場戰爭、反抗霸權，最後因此犧牲嘅領袖蒂亞拉茹(Sepé Tiaraju)，由一位喺傳教村成長嘅普通本地人，成為咗今日巴西嘅一位聖人。

今日提起殖民歷史，我哋往往會認為只不過係殖民者同被殖民者之間嘅衝突。呢段關於傳教村嘅歷史正正可以呈現到當時外來者同土著嘅關係有幾複雜。殖民者固然殘忍自私，傳教士雖然來自同殖民者同樣嘅文化背景（其實要分返西班牙同葡萄牙，不過呢度從略），卻願意同當地人一齊對抗侵略者。另一方面，傳教士亦都以歐洲基督教中心思想去開化本地人，引進文明嘅同時亦必然會破壞原住民嘅文化。香港，同樣作為前殖民地，究竟應該點樣看待殖民歷史同前宗主國？呢段歷史值得我哋反思。